ചില ഇടപെടലുകള്‍

മ്രുതപ്രാണനായ ഇ-ലോകം :-വികലമായ സിനിമാ ചര്‍ച്ചകള്‍ എങ്ങെനെയൊക്കെ നമ്മുടെ സാംസ്കാരിക അന്തരീക്ഷത്തെ മലിനമാക്കുന്നു?

2011-11-20T00:04:00.001-08:00

ഒരു സോഷ്യല്‍ നെറ്റ് വര്‍ക്കിനു എന്തെല്ലാം ചെയ്യാനാവും എന്ന് നാം വിചാരിക്കുന്നുവോ അതിലുമപ്പുറം അതിലൂടെ പലരും ചെയ്തു കാണിച്ചിട്ടുണ്ട്. ബ്ലോഗുകളിലൂടെ മ്രുതപ്രാണനായ നമ്മുടെ ഭാഷയെ (ഭാഷകളെ) പുനരുജ്ജീവിപ്പിക്കാന്‍ (പരിമിതികളുണ്ടിങ്കിലും) പലര്‍ക്കും കഴിഞ്ഞിട്ടുണ്ട്. ഒരു ഭരണകൂടത്തെ തന്നെ മാറ്റിമറിക്കത്തക്ക ശക്തിയില്‍ ഫേസ്ബുക് പോലുള്ള കൂട്ടങ്ങള്‍ മാറുന്ന കാഴ്ച്ച നാം അറബ് വസന്തത്തിലൂടെ കണ്ടു.സക്രിയമായ സിനിമാ ചര്‍ച്ചകള്‍, സാഹിത്യ അവലോകനങ്ങള്‍, പൊതു വിഷയങ്ങള്‍, സൗഹ്രുദ സംഭാഷണങ്ങള്‍ പുതു കലാ പരിചയങ്ങള്‍..അങ്ങിനെ വളരെ സജീവമായ ഒരു അന്തരീക്ഷം തരാന്‍ ഇ-ലോകത്തിനു കഴിഞ്ഞിട്ടുണ്ട്. സിനിമയിലേയും സംഗീതത്തിലേയും വ്യാജന്മാരെ തുറന്നു കാണിക്കാനും ഈ ഇ ലോകത്തിനു കഴിഞ്ഞു. അറിവിന്റെ ഒരു സാര്‍വദേശീയതക്ക് ഇവ വഴിവെച്ചിട്ടുണ്ട് എന്നതില്‍ സംശയമില്ല.
എന്നാല്‍ നോക്കുക, ഇന്നു നാം അടിക്കടി ചെയ്യന്ന ചര്‍ച്ചകള്‍ (പ്രധാനമായും ഫേസ്ബുക്ക് പോലുള്ള കൂട്ടായ്മകളില്‍) എന്താണ്?
1 .സന്തോഷ് പണ്ടിറ്റ്
2 . പ്രിഥ്വിരാജപ്പന്‍

മടുപ്പ് എന്നത് അന്യം നിന്നെന്നു തോന്നുന്നു ഈ ചര്‍ച്ചകള്‍ കാണുമ്പോള്‍. മാസങ്ങളായി പലരും ഇവ ആവേശപൂര്‍വ്വം ചര്‍ച്ച ചെയ്യുന്നു. അവ ചാനലുകളിലെത്തുന്നു, തീയറ്ററുകളിലെത്തുന്നു. ബഹു രസം അല്ലെ?
ലോകം സ്വാതന്ത്ര്യത്തെക്കുറിച്ചും സമത്വത്തെക്കുറിച്ചും സംസാരിക്കുമ്പൊള്‍ നമുക്ക് കോപ്രായങ്ങള്‍ മതി. മറ്റുള്ളവനെക്കൂടെ "മക്കാറാ"ക്കുന്ന ഒരു സാഡിസ്റ്റിക് സുഖത്തില്‍ രമിച്ചു വാഴുകയാണ് മലയാളികള്‍. ലജ്ജ എന്ന വാക്ക് കേട്ടിട്ടുള്ള ഒരുത്തനെങ്കിലും ഇമ്മാതിരി വീഡിയോകള്‍/ഫോട്ടോകള്‍ വീണ്ടും വീണ്ടും ഷെയര്‍ ചെയ്യുമോ? ഈയടുത്ത് കേട്ടു ഫിലിം ഫെസ്റ്റിവെലില്‍ പോലും സന്തോഷ് പണ്ടിറ്റിനെക്കുറിച്ച് പറഞ്ഞ് ആള്‍ക്കാര്‍ രസിക്കുന്നത്രേ... ഇത്ര മലിനമായ ഒരു സാംസ്കാരിക അന്തരീക്ഷമായി മാറി കേരളം. ഈ വീഡിയോകള്‍ ഷെയര്‍ ചെയ്യാത്തതോ ലൈക് ചെയ്യാത്തതോ ആയ മലയാളി ബൂലോകര്‍ ഇല്ല എന്ന അവസ്ഥ വരാറായി.

ആദ്യത്തെ കേസില്‍ ആസ്വാദനത്തിന്റെ നെല്ലിപ്പലകയേക്കാള്‍ നൂറടി താഴെയെത്തിനിന്നു സുഖിക്കുന്ന അവസ്ഥയാണെങ്കില്‍ രണ്ടാമത്തേത് (പ്രിഥ്വിരാജ്) എന്തിനെന്നറിയാതെയുള്ള ഒരു പടപ്പുറപ്പാടാണ്! ഒരു നടനെക്കുറിച്ച് പറയുമ്പോള്‍ സക്രിയമായി അയാളുടെ അഭിനയത്തെ വിമര്‍ശിക്കുകയോ പരാമര്‍ശിക്കുകയോ ആണ് വേണ്ടത്. സാമൂകിക വിരുദ്ധമായി ഒന്നും പറയാത്തിടത്തോളം കാലം അയാളുടെ ഇന്റര്‍വ്യൂകളെ വിമര്‍ശിച്ച് അധര വ്യായാമം നടത്തുന്നത് എന്തിനാണ്? പലരും ഇവ ഒരു രസത്തിനായാണ് ഷെയര്‍ ചെയ്യുന്നത് അല്ലാതെ അയാളോട് ഒരസഹിഷ്ണുതയും ഉണ്ടായിട്ടല്ല. ഒന്നോ രണ്ടോ തവണെ നമുക്കിത് മനസ്സിലാക്കാം. എന്നാല്‍ ഇതൊരു അസുഖമായാലോ...? നാം ചെയ്യുന്ന ചരിത്രപരമായ മണ്ടത്തരമാണിവ.

മലയാള ബൂലോകം അതിന്റെ അന്തിമ ദിശയിലാണെന്നു തോന്നുന്നു. ഇത്തരം ചര്‍ച്ചകളില്‍ മനം മടുത്ത് ഇപ്പോള്‍ ഫേസ്ബുക് നോക്കാറില്ല എന്ന് പല സുഹ്രുത്തുക്കളും പറയുകയുണ്ടായി. ഒരു സോഷ്യല്‍ നെറ്റ്വര്‍ക്കില്‍ സീരിയസ് ആയാല്‍ ഡിസ്കഷന്‍സ് മാത്രമല്ല ഉണ്ടാവുക, മറിച്ച് നര്‍മ്മ സംഭാഷണങ്ങളും എന്തിനു, സല്ലാപങ്ങളും ഉണ്ടായിരിക്കും. അവ അതിന്റെ ജൈവികതയുടെ നിലനില്പ്പിനു സഹായിക്കുന്നവയുമാണ്.
എന്നാല്‍ ഏകതാനമായ ഇത്തരം വൈക്രുതങ്ങള്‍ സഹിക്കാവുന്നതിലും അപ്പുറമായി. പ്രബുദ്ധര്‍ എന്നു വിശ്വസിക്കുന്ന പല സുഹ്രുത്തുക്കളും വീണ്ടും വീണ്ടും അത്തരം ചര്‍ച്ചകളിലേക്ക് വഴുതിപ്പോവുന്ന കാഴ്ച്ച ശോചനീയമാണ്. ഇപ്പോള്‍ എല്ലാവരും തന്റെ സന്തോഷ് പണ്ടിറ്റ് അനുഭവം (നല്ലതാണെങ്കിലും തെറി ആണെങ്കിലും) പങ്കുവക്കുന്ന തിരക്കിലാണ്! മലയാള സിനിമക്കുള്ള താക്കീത്, അന്തിക്ക്രിസ്തു, ബുദ്ധിമാനായ ബിസിനസ്സുകാരന്‍, വിഡ്ഢി, ആദര്‍ശവാന്‍, ഗാന്ധിയന്‍..... മണ്ണാങ്കട്ട. നിങ്ങള്‍ക്കൊന്നും പറയാന്‍ വേറെ വിഷയങ്ങളില്ലേ?

ഇ-ലോകത്തിലൂടെ നാം പുതുതായി നേടിയെടുത്തു വരുന്ന ഒരു സാംസ്കാരിക ഉന്നമനത്തേ പാടേ നശിപ്പിക്കുന്നവയാണ് ഇത്തരം ചര്‍ച്ചകള്‍. ഇതിനെ നിരുല്‍സാഹപ്പെടുത്തേണ്ടത് നമ്മുടെ കടമയാണ്. ഈ കോപ്രായങ്ങണെ അനുകൂലിച്ചുകൊണ്ടോ പ്രതികൂലിച്ചുകൊണ്ടോ സ്റ്റാറ്റസ്സുകള്‍, വീഡിയോകള്‍, ചിത്രങ്ങള്‍ എന്നിവ ഷെയര്‍ ചെയ്യില്ല എന്നു നമുക്ക് ഉറപ്പ് വരുത്തിക്കൂടെ? കൂടാതെ ഇത്തരം ചര്‍ച്ചകളെ നിശിതമായി വിമര്‍ശിക്കുകയും നിരുല്‍സാഹപ്പെടുത്തുകയും ചെയ്താലേ ഇവ അവസാനിക്കൂ. മലയാളിക്ക് വിശാലമായ ലോകത്തേക്കുള്ള ജാലകങ്ങള്‍ തുറന്നു തന്ന ഈ ഇ-ലോകത്തെ ഈ വൈക്രുത ലോകത്തേക്ക് ചുരുക്കാതിരിക്കുക. സക്രിയമായ ചര്‍ച്ചകള്‍ ഉണ്ടാവട്ടെ.

വിദ്യാര്‍ഥി മാസിക, വിജയന്മാഷ് അനുസ്മരണ പതിപ്പ്

2011-10-04T10:22:00.000-07:00

ഒരു വ്യക്തിയെ ഓര്‍ക്കുക എന്നാല്‍ എന്താണ്? അയാളുടെ ശരീരത്തേയോ ശബ്ദത്തേയോ സാമീപ്യത്തേയോ സ്വഭാവത്തേയോ കുറിച്ചുള്ള നമ്മുടെ ചിന്തകളെ ഓര്‍മ്മ എന്നു പറയാം. അപ്പോള്‍ ഓര്‍മ്മ എത്രകണ്ടു പ്രസക്തമാണ്? എന്നാല്‍ ഓര്‍ക്കുന്നത് അയാളുടെ ആശയങ്ങളെ ആയാലോ. അത്തരം ഓര്‍മ്മകള്‍ വെളിച്ചങ്ങളാണ്, അഗ്നിയാണ്. അവയുടെ ചില സ്ഫുലിംഗങ്ങള്‍ മതി നൂറു പന്തങ്ങള്‍ക്ക് തീകൊളുത്താന്‍. അങ്ങനെ ഓര്‍മ്മകള്‍ ഊര്‍ജ്ജ സ്രോതസ്സുകളായി മാറുന്നു. അത്തരം ഓര്‍മ്മകള്‍ ആവര്ത്തനങ്ങളല്ല. മറിച്ച് തുടര്‍ച്ചകളോ ആരംഭങ്ങളോ ആണ്. ഇവിടെ ഞങ്ങള്‍ ഒരു വിജയന്മാഷ് (എം എന്‍ വിജയന്‍) അനുസ്മരണ പതിപ്പ് പ്രസിദ്ധീകരിക്കുന്നു. മാഷിന്റെ ലേഖനങ്ങള്‍, അഭിമുഖങ്ങള്‍, പ്രസംഗങ്ങള്‍ എന്നിവയെ വീണ്ടും ഒരു സക്രിയമായ ചര്‍ച്ചയിലേക്ക് എത്തിക്കുക എന്ന ആഗ്രഹമാണ് ഇതിനു പിന്നില്‍. താങ്കളുടെ സജീവമായ പങ്കാളിത്തം പ്രതീക്ഷിക്കുന്നു. പതിപ്പിലേക്ക് പോവാന്‍ താഴത്തെ ലിങ്കില്‍ ക്ലിക്കുക.

http://vidyarthimnvijayanspecial.blogspot.com/

ചില വിദ്യാഭ്യാസ ചിന്തകൾ 2: വൈരുദ്ധ്യാത്മക കോടതി

2011-08-26T22:49:00.000-07:00

ഒരു മാർക്സിസ്റ്റ് ചിന്തകൻ വിഷയങ്ങളെ അപഗ്രഥിക്കുന്നത് അതിലുള്ള വരുദ്ധ്യങ്ങൾ പഠിക്കുക വഴിയാണ് എന്ന് കേട്ടിട്ടുണ്ട്. ഇവിടെയിതാ അവരെയെല്ലാം കടത്തി വെട്ടിക്കൊണ്ട് കോടതി അതി വൈരുദ്ധ്യത്തിലെത്തിയിരിക്കുന്നു. കൃത്യം ഒരു കൊല്ലം മുൻപ് കോടതി നടത്തിയ സ്റ്റേറ്റ്മെന്റ് "സ്വാശ്രയ വിദ്യാഭ്യാസം വാണിജ്യശാലകളായി" എന്നായിരുന്നു. വാർത്ത ഇവിടെ വായിക്കാം

http://www.mathrubhumi.com/online/malayalam/news/story/494745/2010-08-31/kerala

ഇതിന്റെ പ്രതികരണമായി അന്ന് എഴുതിയ ലേഖനം ഇവിടെ

http://etapetalukal.blogspot.com/2010/08/blog-post_31.html

എന്നാൽ ഈ ആഴ്ച വന്ന കോടതി വിധി ഇങ്ങനെ

സ്വാശ്രയ മെഡിക്കല്‍ പ്രവേശന പരീക്ഷ റദ്ദാക്കിയ ഹൈക്കടതി വിധി സുപ്രീം കോടതി സ്‌റ്റേ ചെയ്തു. സ്വാശ്രയ മെഡിക്കല്‍ മാനേജുമെന്റുകള്‍ക്ക് പ്രവേശന നടപടികളുമായി മുന്നോട്ടുപോകാമെന്നും ഈമാസം 31നകം പ്രവേശന നടപടികള്‍ പൂര്‍ത്തിയാക്കണമെന്നും കോടതി നിര്‍ദേശിച്ചിട്ടുണ്ട്. മെഡിക്കല്‍ മേനേജുമെന്റ് അസോസിയേഷന്‍ നല്‍കിയ ഹര്‍ജിയിലാണ് ഉത്തരവ്.

ജൂലായ് 11ന് സംസ്ഥാനത്തെ 11 സ്വാശ്രയ കോളേജുകള്‍ നടത്തിയ പ്രവേശനപരീക്ഷയാണ് ഹൈക്കോടതി റദ്ദാക്കിയത്. പ്രവേശന പരീക്ഷ നിയമവിരുദ്ധമാണെന്നും സംസ്ഥാന സര്‍ക്കാരിന്റെ പൊതുപ്രവേശന പരീക്ഷയുടെ റാങ്ക് ലിസ്റ്റില്‍നിന്നും പ്രവേശനം നടത്തണമെന്നുമായിരുന്നു ഹൈക്കോടതിയുടെ നിര്‍ദേശം

വാർത്ത ഇവിടെ വായിക്കാം

http://www.mathrubhumi.com/story.php?id=210204

ഇത്രയു വരുദ്ധ്യം നമുക്ക് എവിടെ കണ്ടെത്താം. ഒരുവാ കൊണ്ട് വിമർശിക്കുകയും മറുവാ കൊണ്ടനുഗ്രഹഇക്കുകയും ചെയ്യുന്ന ഈ കോടതി ഒരപാര സംഭവം തന്നെ.

വർഷാ വർഷം ചീഞ്ഞളിഞ്ഞുകൊണ്ടിരിക്കുന്ന മേഖലയാണ് വിദ്യാഭ്യാസം. കാരക്കോണം കോളേജിലെ കഴുതക്കച്ചവടം നാം ടിവിയിലൂടെ നേരിട്ട് കണ്ടതാണ്. കേരള മെഡിക്കൽ എൻട്രൻസിൽ ക്വാളിഫൈ ചെയ്യുക പോലും ചെയ്യാത്തവരെയാണ് ലക്ഷങ്ങളുടെ കോഴ കൊടുത്ത് എം ബി ബി എസ് നു ചേരുന്നത്. ( ക്വാളിഫൈ ചെയ്ത 50000 വിദ്യാർത്ഥികളെ ഒഴിച്ചാൽ പ്ലസ്ടു സയൻസ് പഠിച്ച എത്ര പേർ ഉണ്ടാവും?) അതായത് സംസ്ഥാനത്തെ ഏറ്റവും മോശം വിദ്യാർത്ഥികളാണ് നാളെ ഇവിടെ പഠിച്ചിറങ്ങി നാട്ടുകാരുടെ നെൻചിൽ കത്തി വക്കാൻ പോവുന്നത്.

മറ്റ് പ്രൊഫഷനുകൾ പോലെയല്ല ഡോക്ടർ എന്നത് തന്നെയാണ് ഇത്രയധികം ചർച്ചകൾക്ക് കാരണം. കഴിവില്ലാത്ത ഒരു എൻചിനിയർക്ക് നാട്ടുകാരെ ദ്രോഹിക്കാൻ കഴിയുന്നതിന് ഒരു പരിധി ഉണ്ടല്ലോ. എന്നാൽ ഡോക്ടർക്കോ...? എം ബി ബി എസ് എന്ന പേരിൽ എവിടേയും ഒരു ക്ലിനിക് തുടങ്ങി അയാൾക്ക് കൊള്ള തുടങ്ങാവുന്നതാണ്. എന്തിന്! ഇപ്പോൾ എം ഡി യും കോഴ കൊടുത്ത് കിട്ടാം എന്നായി. എം ബി ബി എസിന്റെ ഇപ്പോഴത്തെ വില 50 ലക്ഷം ആണെന്ന് കേട്ടു. എം ഡിയുടേത് ഒന്നര കോടിയും ! അങ്ങിനെ രണ്ട് കോടി കൊടുത്ത് ഡോക്ടറായി വരുന്നവൻ/ൾ രോഗിയുടെ പോക്കറ്റല്ലാതെ മറ്റൊന്നും പരിശോധിക്കില്ല എന്നതിൽ ഒരു സംശയവുമില്ല. ആശുപത്രികൾ കൂടുന്നത് മെച്ചപ്പെട്ട ആരോഗ്യ അവസ്ഥയാണോ എന്ന് ചോദിക്കുന്നപോലെ കൂടുതൽ ഡോക്ടർമാർ ഉണ്ടായാൽ സംസ്ഥാനത്തിന്റെ ആരോഗ്യം മെച്ചപ്പെടുമോ എന്ന് ചോദിച്ചാൽ..? ഇവർക്കൊക്കെ കാശുണ്ടാക്കാനായി പുതിയ രോഗങ്ങൾ തന്നെ വരുമോ എന്നു പോലും പേടിച്ചു പോവും ഈ പോക്കുകണ്ടാൽ..!

ഈ അവസരത്തിലാണ് സുപ്രീം കോടതിയുടെ വിധി. പണ്ടും സ്വാശ്രയ മാനേജ്മെന്റുകളുമായി ധാരണയിലെത്തിയ ജഡ്ജികളെക്കുറിച്ചുള്ള വാർത്തകൾ നമ്മൾ കേട്ടിരിക്കുന്നു. ആരെങ്കിലും എതിർത്താൽ അത് കോടതിയലക്ഷ്യമായി. ഇത്തരം ജനവിരുദ്ധ വിധികൾ നടത്തുന്ന കോടതിയെ വിമർശനാതീതമായി കാണുന്നത് നാം എന്ന സമൂഹത്തിന്റെ കഴിവുകേടല്ലേ.. കോടതിയും സർക്കാരും ഉദ്യോഗസ്ഥ വ്രുന്ദവും പ്രൈവറ്റ് മാനേജ്മെന്റുകളുടെ കസ്റ്റോഡിയൻമാരാകുംപോൾ നമുക്ക് എങ്ങനെ നിശ്ശബ്ദത പാലിക്കാനാകും?

പ്രൈവറ്റ് മേഖലയെ പുണ്യാളൻമാരാക്കി അഴിമതി വിരുദ്ധർ എന്ന് പറയുന്നവരോട് നല്ല നമസ്കാരമേ പറയാനുള്ളൂ. ഇത്തരം കൊള്ളകളെ പ്രൊഫഷണലിസം എന്നു വിളിക്കുകയും ഹസാരയുടെ സമരത്തെ പിന്താങ്ങുകയും ചെയ്യുന്ന അപ്പർ മിഡിൽക്ലാസ് ഹൈക്ലാസ് കാപട്യങ്ങളെ തിരിച്ചറിയാതെ വയ്യ. ഇന്നത്തെ അഴിമതി വിരുദ്ധ സമരക്കാരിൽ ഭൂരിഭാഗംപേരും സ്വാശ്രയ വിദ്യാഭ്യാസത്തെ അനുകൂലിക്കുന്നവരോ അതിലുപരി അതിന്റെ വക്താക്കളോ ആണ്. അഴിമതിക്കെതിരായി സമരം വരേണ്ടതു തനെയാണ്. പക്ഷെ അത് സമഗ്രമായ ഒരു കാഴ്ച്ചപ്പാടോടെ ആവണം. കേരളത്തെ സംബന്ധിച്ചിടത്തോളം ദൂരവ്യാപകമായ ദോഷവശങ്ങളൂള്ള കാര്യമാണ് സ്വാശ്രയ മെഡിക്കൽ കോളേജുകൾ എന്നത്. കുറഞ്ഞത് മെഡിക്കൽ വിദ്യാഭ്യാസ മേഖലയിലെങ്കിലും ഈ സ്വാശ്രയ ഭീമൻമാരെ ഒഴിവാക്കിയില്ലെങ്കിൽ രോഗാതുരമായ ഒരു സംസ്ഥാനമായി കേരളം മാറും എന്നതിൽ സംശയമില്ല.

വോട്ട് ചെയ്യേണ്ട എന്ന് തീരുമാനിച്ചവരോട്

2011-04-12T08:02:00.000-07:00

ഇലക്ഷനിൽ മൽസരിക്കുന്ന ഒരു സ്ഥാനാർത്ഥിയും ജയത്തിനർഹരല്ല എന്ന്

തോന്നുന്നുണ്ടെങ്കിൽ വോട്ടിനു പോകാതിരിക്കരുത്. എല്ലാ ബൂത്തിലും 49-ഒ നിയമപ്രകാരം ഫോം

ഉണ്ടാകും. ഒരു സ്ഥാനാർത്ഥിയും വോട്ടിനർഹരല്ല എന്ന് അവിടെ രേഖപ്പെടുത്താം. ഈ

പ്രത്യേക വോട്ടുകൾക്ക് ഭൂരിപക്ഷം ലഭിച്ചാൽ ഇലക്ഷൻ അസാധു ആയി പ്രഖ്യാപിക്കും. ഈ

ജനഹിതപരിശോധന പോളിങ്ങ് മെഷീനിൽ തന്നെ വരേണ്ടതാണ്. ഇപ്പോഴത്തെ അവസ്ഥയിൽ

ബൂത്തിലുള്ള എല്ലാവരും അറിഞ്ഞ് വേണം രേഖപ്പെടുത്താൻ. എന്നാൽ തന്നെയും നിങ്ങളുടെ ശക്തമായ

അഭിപ്രായം രേഖപ്പെടുത്താൻ ഇതുപയോഗിക്കാവുന്നതാണ്

പോലീസും ജോത്സ്യനും നിയമ വ്യവസ്ഥയും

2010-09-12T03:02:00.000-07:00

ഹൈസ്കൂളിൽ ഒരു കഥ പഠിച്ചിരുന്നു. ഒരു ബ്രിട്ടൺ പശ്ചാത്തലത്തിലുള്ള ഒരു ഭാവി പറച്ചിലുകാരിയുടെ കഥ. അവർക്കെതിരെ ഒരാ‍ൾ കോടതിയിൽ കയറുന്നു. കാർഡ് നോക്കിയുള്ള അവരുടെ പ്രവചനങ്ങൾ ശരിയല്ല എന്നാണ് വാദം. ജഡ്ജി ആ വാദം ശരിവച്ചു. തനിക്കും കാർഡ്പ്രവചനം കുറച്ചൊക്കെ അറിയാമെന്ന് ജഡ്ജി! അതിനാൽ ഈ ഭാവിപറച്ചിലുകാരി തെറ്റായ ഫലപ്രവചനമാണ് നടത്തുന്നത് എന്ന് പറഞ്ഞ് അവരെ ജയിലിലടക്കുന്നു. എന്നിട്ട് ജഡ്ജിയുടെ ഫലപ്രവചനവുമുണ്ട്. കോടതിക്കെതിരെയുള്ള ഒരു ആക്ഷേപഹാസ്യമായിരുന്നു ആ കഥ. ജോത്സ്യവും മന്ത്രവാദവുമെല്ലാം നിയമത്തോട് ഏറ്റുമുട്ടിയാൽ എന്താവും ഗതി...? സംശയമില്ല ജഡ്ജിമാരും പോലീസുകാരും ജോത്സ്യം പഠിക്കേണ്ടിവരും....!!

12/09/10 ഞായറാഴ്ച മാത്രുഭൂമിയിൽ കണ്ട വാർത്തയാണ് ഇതോർക്കാൻ കാരണം. അന്ധവിശ്വാസം മൂത്ത് പിതാവ് പിഞ്ചുകുഞ്ഞിനെ നിലത്തെറിഞ്ഞ് കൊന്നു. ജനിക്കുമ്പോളേ കുഞ്ഞിന് പല്ലു മുളച്ചിരുന്നത്രെ. ഇത് അപകട ശകുനമാണെന്ന് പലരും അയാളോട് പറഞ്ഞു. ജോത്സ്യനോട് ചോദിച്ചപ്പോൾ മൂപ്പരും പറഞ്ഞു ഇതപകടമാണെന്ന്. ഇതിനാലാണ് കൊന്നത് എന്ന് അയാൾ മൊഴി നൽകി. വാർത്ത ഇവിടെ വായിക്കാം. വാർത്ത അവസാനിക്കുന്നത് ഇങ്ങനെയാണ് കുഞ്ഞ് ജീവിച്ചാല്‍ അച്ഛന് ദോഷമാകുമെന്ന് മധുവിനെ ധരിപ്പിച്ച പുന്നപ്രസ്വദേശിയായ ജോത്സ്യനെ വിശദമായി ചോദ്യം ചെയ്യുമെന്ന് ആലപ്പുഴ സൗത്ത് സി.ഐ. വി.കെ. സനില്‍കുമാര്‍ പറഞ്ഞു. ദോഷമകറ്റാന്‍ പരിഹാരക്രിയകള്‍ നടത്താനാണ് നിര്‍ദേശിച്ചതെന്നും കുഞ്ഞിനെ കൊലപ്പെടുത്താന്‍ പ്രേരിപ്പിച്ചില്ലെന്നും ജ്യോത്സ്യന്‍ പറഞ്ഞതായി പോലീസ് വ്യക്തമാക്കി“““”“.“

അടിസ്ഥാനപരമായി ഇവിടെ ഒരു പ്രശ്നം ഉദിക്കുന്നു. പോലീസ് ഏതുരീതിയിലാണ് ജോത്സ്യനെ ചോദ്യം ചെയ്യേണ്ടത്.?

i) കുഞ്ഞിനെ കൊല്ലാൻ പറഞ്ഞോ എന്ന് ചോദിച്ച് തടിയൂരാം.ഇല്ല എന്ന ലളിതമായ മറുപടി. ജോത്സ്യനും രക്ഷപ്പെട്ടു.

ii) ഇത് ദോഷമാണ് എന്നു പറഞ്ഞോ എന്ന ചോദ്യമായാലോ? തീർച്ചയായും സമ്മതിക്കാതെ വയ്യ ജോത്സ്യന്. അപ്പൊ പിന്നെ രണ്ട് ചോദ്യങ്ങളാണുള്ളത്.

1.ജോത്സ്യ വിധിപ്രകാരം ഇത് ശരിയാണോ. ആണെങ്കിൽ ജോത്സ്യനെ വെറുതെ വിടാം. അപ്പൊൾ ആ അഛൻ ചെയ്ത തെറ്റെന്ത്? അപകടമാണെന്നറിയുകയും പരിഹാര കർമ്മത്തിന് പണമില്ലാതെ വരികയും ചെയ്തതിനാലാണ് ഇതുണ്ടായത് എന്നയാൾ പറഞ്ഞാൽ...? ഇത് ആ കുട്ടിയുടെ വിധി എന്ന് പറയുമോ പോലീസ്? ഇനി ജോത്സ്യവിധി ഇങ്ങനെയല്ല എങ്കിൽ ആ അഛനെ വെറുതെ വിടാം. മര്യാദക്ക് ജോത്സ്യം പഠിക്കാത്ത ജോത്സ്യനെ ശിക്ഷിക്കാം ..

2 അന്ധവിശ്വാസം പരത്തുന്ന ജോത്സ്യനെ ശിക്ഷിക്കാൻ വിധിച്ചാലോ...? നാട് മുഴുവൻ ജോത്സ്യന്മാരാണ്. ഒരുപാട് പേരെ കൊല്ലാക്കൊല ചെയ്തുകൊണ്ടിരിക്കുന്നു അവർ. ഒരാളെ മാത്രമായി ശിക്ഷിക്കുന്നതെങ്ങനെ?

നീതീ പീഠത്തിനോട് ചോദിക്കാനുള്ളത് ഇതാണ്. എങ്ങിനെയാണ് നിങ്ങൾ അന്ധവിശ്വാസം അളക്കുന്നത്. പരിഹാരനിർദ്ദേശം മാത്രമാണെങ്കിൽ ജ്യോത്സ്യൻ നിരപരാധിയോ? ഇനി കുഞ്ഞിനെ കൊല്ലണം എന്നു തന്നെയാണ് പറഞ്ഞതെങ്കിൽ..? ജ്യോത്സ്യം പ്രകാരം കൊല്ലുകയാണ് പരിഹാരമെങ്കിൽ..? ജ്യോത്സ്യനെ കുറ്റവാളിയാണെന്ന് എങ്ങനെ വിധിക്കും? ഇനി അങ്ങനെ വിധിക്കുകയാണെങ്കിൽ അന്ധവിശ്വാസത്തിന്റെ പരിധി കോടതി എങ്ങനെ തീരുമാനിക്കും? യാഥാർഥ്യവുമായി യാതൊരു ബന്ധവുമില്ലാത്ത കാര്യങ്ങൾ പറഞ്ഞു പരത്തുന്നവർ നിയമത്തിന്റെ കാഴ്ച്ചയിൽ നിരപരാധികളാണോ? ഈ വാർത്ത ഇത്രയും ഞെട്ടിപ്പിക്കുന്നതായതിനാൽ പുറത്തു വന്നു. സമൂഹത്തിൽ നടന്നുകൊണ്ടിരിക്കുന്നത് ഇതുതന്നെയല്ലേ. പലതും മരണത്തിലേക്ക് എത്തുന്നില്ല എന്നു മാത്രം. ചൊവ്വാ ദോഷം, ശനിയപഹാരം.. തുടങ്ങി എത്രയെത്ര പൊള്ളത്തരങ്ങൾ? എത്ര വിദ്യാഭ്യാസമുള്ളവരും വെറുതെ എന്തിനാ റിസ്ക് എടുക്കണത് എന്നു പറഞ്ഞ് ജാതകം നോക്കുന്നു. അവരേയും പറഞ്ഞിട്ട് കാര്യമില്ല. ജോത്സ്യം പഠനവിഷയമാക്കുന്ന കാലമാണിത്.

ഈ മരണത്തിന് ഉത്തരവാദി ആരാണ്? അഛൻ എന്നു പറയുകയാണെങ്കിൽ അയാളുടെ വിവരമില്ലായ്മ കൊണ്ടും മറ്റുള്ളവരുടെ പ്രേരണ കൊണ്ടുമാണ് ചെയ്തത് എന്നു പറയാം. ജോത്സ്യനാണെങ്കിലോ...? താൻ പഠിച്ച ജോത്സ്യ വിധിപ്രകാരം ഇതു ശരിയാണെന്ന് വാദിക്കാം. അല്ലെന്ന് ആർക്ക് തെളിയിക്കാനാകും? പ്രേരിപ്പിച്ച മറ്റാളുകളോ...? ദിനം പ്രതി ജോത്സ്യം ശാസ്ത്രീയമാണെന്ന് പറഞ്ഞു വരികയാണ്. ചിലപ്പോൾ കുഞ്ഞിന്റെ പല്ലും പിതാവിന്റെ ആയുസ്സും തമ്മിൽ വല്ല ശാസ്ത്രീയ കണക്ഷനുമുണ്ടെന്ന് ഗോപാലക്രിഷ്ണന്മാർ പറഞ്ഞേക്കാം. അപ്പൊ പിന്നെ സുഹ്രുത്തിനെ ഉപദേശിച്ചതിൽ എന്താണ് തെറ്റ്? നിയമം കുടുങ്ങിപ്പോകും.

ഒരു ആർഷ ഭാരത സുഹ്രുത്ത് എന്നോട് ചോദിച്ചിരുന്നു.”അല്ല നിങ്ങളെന്തിനാണ് എപ്പോഴുമിങ്ങനെ എതിർക്കുന്നത്? വേദവും ജോത്സ്യവുമൊക്കെ ശാസ്ത്രമാണെന്ന് പറഞ്ഞാൽ എന്ത് ദോഷമാണ് ഉണ്ടാകുക?” പറയാനുള്ളത് ഇത്രമാത്രം. ഒന്നോ രണ്ടോ ശ്ലോകങ്ങൾ അളന്നു മുറിച്ചെടുത്ത് ആധുനിക ശാസ്ത്രത്തിലേക്ക് വലിച്ചു നീട്ടി ഇതെല്ലാം നമ്മന്റെ ആളുകളുടേതാണെന്ന് പറയുമ്പോൾ സാധൂകരിക്കപ്പെടുന്നത് നൂറ്റാണ്ടുകളിലൂടെ വളർന്നു വരുന്ന മുഴുവൻ അന്ധവിശ്വാസവും അനാചാരങ്ങളുമാണ്. (പൈത്രുകം സിനിമ ഓർക്കുക. യാഗം ചെയ്ത് മഴ പെയ്യിച്ചപ്പോൾ എന്താണ് പ്രേക്ഷക മനസ്സിൽ...? ഒടിയനും മായനും മറുതയുമൊക്കെ ശരിക്കുമുള്ളതാ.......!)

ഇത്തരം പ്രവണതകൾ സമൂഹത്തിൽ വർദ്ധിച്ചു വരികയാണ്. സമൂഹം മുഴുവൻ അന്ധമായിക്കൊണ്ടിരിക്കുന്നു. അഭ്യസ്ത വിദ്യരെപ്പോലും ഇത്തരം ശാസ്ത്ര-വേദാനുവാചകർ സശയത്തിലാക്കുന്നു. ബുധന്റേയും ശനിയുടേയും മാഗ്നറ്റിക് ഫീൽഡു കാരണം അതുണ്ടാവും ഇതുണ്ടാവും, ഇവയൊക്കെയാണ് ജോത്സ്യത്തിനാധാരം എന്ന് പറഞ്ഞാൽ ഒരു ബി എസ് സി ഫിസിക്സുകാരനും ശരിയാണല്ലോ എന്ന് ചിന്തിച്ചുപോകും. ഐ എസ് ആർ ഒ റോക്കറ്റ് വിക്ഷേപണം പോലും ജോത്സ്യൻ പറഞ്ഞ സമയത്തേ നടത്താറുള്ളൂ എന്ന് കേട്ടാൽ ആരാണ് ജോത്സ്യം പകുതിയെങ്കിലും സത്യമാണ് എന്ന് പറയാതിരിക്കുക! ഇങ്ങനെയുള്ള സമൂഹത്തിൽ ഇത്തരം കൊലകൾ നടന്നില്ലെങ്കിലേ അൽഭുതമുള്ളൂ. ആർഷ ഭാരതരേ, ജ്യോതിഷ പ്രമാണിമാരേ അന്ധവിശ്വാസികളായ ശാസ്ത്രജ്ഞരേ... നിങ്ങളാണ് ആ കുട്ടിയെ കൊന്നത്.

ചില വിദ്യാഭ്യാസ ചിന്തകള്‍

2010-09-01T10:40:00.000-07:00

ഈയിടയായി ഒരു ശാസ്ത്രജ്ഞനെക്കുറിച്ച് പറഞ്ഞു കേട്ട ഒരു കാര്യം പറയാം . മൂപ്പരുടെ ഭാര്യയും ഒരു ഉയര്‍ന്ന ഗവര്‍മെന്‍റ് ഉദ്യോഗസ്ഥയാണ്. മൂപ്പര്‍ക്കും ഭാര്യക്കും കൂടി കിട്ടുന്ന ശംപളം മകന്‍റെ പഠിപ്പിനു തികയുന്നില്ലത്രേ. കുടുംബ ചിലവിന് അമ്മായിയപ്പന്‍റെ കയ്യില്‍നിന്ന് വാങ്ങിയാണ് മാസം അവസാനിക്കുന്നത് എന്ന്! മകന്‍ പ്ലസ്2 പോലും കഴിഞ്ഞിട്ടില്ലെന്ന് ഓര്‍ക്കണം.
നാട്ടിലേക്ക് വരുംപോള്‍ ഒരു ഗുജറാത്ത് താമസക്കാരനായ മലയാളിയെ പരിചയപ്പെട്ടു. മൂപ്പറ് മകളെ 10 നു ശേഷം ഗുജറാത്തില്‍ പഠിപ്പിക്കുകയാണ്. "ഉന്നത" വിദ്യാഭ്യാസം. ഒരു കൊല്ലം ഒന്നര ലക്ഷം ഫീസ്! അന്തം വിട്ടൊന്നുമില്ല. തിരുവനന്തപുരത്ത് പ്രൈവറ്റ് സ്കൂളില്‍ എല്‍ കെ ജി യില്‍ ചേര്‍ക്കാന്‍ 20000 രൂപ കൊടുത്തയാളെ ഞാനറിയും.
മറ്റൊരവസരത്തില്‍ ഐ ഐ ടികളെ കുറിച്ച് സംസാരിക്കുകയായിരുന്നു. ഭാവി ശാസ്ത്രജ്ഞരുമായാണ് സംസാരം. ഒരു കൊല്ലം ഒരു ലക്ഷം വരെ ഫീസാണ് ഐ ഐ ടി കളില്‍ വാങ്ങുന്നത്...!!!! ഇന്ത്യയിലെ ഏറ്റവും നല്ല വിദ്യാര്‍ഥികള്‍ക്കാണ് ഇത്രയും ഫീസ് എന്ന് ഓര്‍ക്കണം. ഇതിന്‍റെ അന്യായത്തെപ്പറ്റി പറഞ്ഞപ്പോള്‍ എനിക്ക് കിട്ടിയത് എതിര്‍പ്പുകള്‍ മാത്രം. വാദങ്ങള്‍ ഇവയൊക്കെ. "ബാങ്കുകള്‍ ഉണ്ടല്ലോ ലോണ്‍ കൊടുക്കാന്‍", "ഗവണ്‍മെന്‍റിന് എല്ലാ സൗകര്യങ്ങളും ഒരുക്കാന്‍ കഴിയണമെന്നില്ല. അപ്പോള്‍ "ഉപഭോക്താക്കള്‍" പണം കൊടുക്കട്ടെ". "ഈ പഠനം കഴിഞ്ഞാല്‍ ആരും ഗവണ്‍മെന്‍റിനു വേണ്ടി പ്രവര്‍ത്തിക്കില്ല. പൈവറ്റ് മേഖലയില്‍ പോകും. അപ്പൊ അവരുടെ ചിലവെന്തിന് ഗവണ്‍മെന്‍റ് വഹിക്കണം?" "പൈസകൊടുത്ത് പഠിച്ച് പ്രൈവറ്റ് കംപനിയില്‍ ഉന്നത വേതനത്തില്‍ ഇരിക്കണൊ അതോ സൗജന്യമായി പഠിച്ചിട്ട് ഗവണ്‍മെന്‍റ് ജോലി(നിര്‍ബന്ധിതമൊ അല്ലാത്തതോ) ചെയ്യണോ എന്നു ചോദിച്ചാല്‍ ആദ്യത്തേതല്ലേ നല്ലത്. അതിലല്ലേ സ്വാതന്ത്ര്യം?
തമിഴ്നാട്ടിലെ ഒരു കോളേജില്‍ നാഷണല്‍ സിമിനാര്‍:" മൂല്യാധിഷ്ഠിത വിദ്യാഭ്യാസം". യോഗ പോലെ മൂല്യം പഠിപ്പിക്കാന്‍ പുതിയ ഡിപ്പാര്‍ട്മെന്‍റ്! അതില്‍ ഒരു പേപ്പര്‍ അവതരിപ്പിക്കുന്നത് പ്രശസ്തമായ പി എസ് ജി കോളേജിലെ പ്രിന്‍സിപ്പാള്‍(ഈ കോളേജിലേക്ക് ഒരു ചടങ്ങിന് വരാനുള്ള ക്ഷണം അബ്ദുള്‍ക്കലാം നിരസിച്ചിട്ടുണ്ട്. നിങ്ങള്‍ അറിവ് വില്‍ക്കുകയാണ് എന്നായിരുന്നു മുന്‍ രാഷ്ട്രപതിയുടെ കമന്‍റ്). ഒരുകാര്യമില്ലെന്നറിഞ്ഞിട്ടും എവിടെയെങ്കിലും കൊണ്ടാല്‍ കൊള്ളട്ടെ എന്ന് വിചാരിച്ച് ഒരു ചോദ്യം ചോദിച്ചു. "ഞങ്ങളുടെ പിന്തലമുറക്ക് കുറച്ചെങ്കിലും സാമൂഹ്യബോധവും മൂല്യവും ഉണ്ടാവാന്‍ കാരണം അവരുടെ വിദ്യാലയ/ കലാലയ അന്തരീക്ഷമാണ്. അവരെ പഠിപ്പിച്ചത് സമൂഹമാണ്. അതിനാല്‍ സമൂഹത്തെ സേവിക്കണം എന്ന ബോധം കുറച്ച് പേര്‍ക്കെങ്കിലും ഉണ്ടായി. എന്നാല്‍ വരും തലമുറ പഠിക്കുന്നത് സ്വന്തം(വീട്ടുകാരുടെ അല്ലെങ്കില്‍ വീട്ടുകാരെടുത്ത ലോണിലെ) പണംകൊണ്ടാണ്. അറിവിനു പോലും വില നിശ്ചയിക്കുന്ന ഈ സമൂഹത്തിനെ എന്തിനവന്‍ സേവിക്കണം? വിദ്യാഭ്യാസം കച്ചവടമാക്കിക്കൊണ്ട് മൂല്യഡിപ്പാര്‍ട്മെന്‍റ് തുടങ്ങിയിട്ടെന്തു കാര്യം". ഉത്തരം വളരെ തമാശയായിരുന്നു (ചോദ്യം ചോദിച്ചതിന് എച് ഒ ഡി യുടെ ചീത്ത പിന്നെ കേട്ടു). "മൂല്യം എന്നത് വ്യക്തിപരമാണ്. പൈസകൊടുത്ത് പഠിക്കുന്നവനും മൂല്യമുണ്ടായേക്കാം(!).നല്ലത് കിട്ടാന്‍ നിങ്ങള്‍ നല്ലത് കൊടുക്കുകയും വേണം."
ഹോംവര്‍ക്ക് ചെയ്യാത്തതിനാല്‍ ക്ലാസിനു പുറത്ത് പോകാന്‍ പറഞ്ഞ ടീച്ചറോട് കുട്ടി: "എന്‍റഛന്‍ 5 ലക്ഷം കൊടുത്താണ് ഞാനീ സീറ്റിലിരിക്കുന്നത്. വേണമെങ്കില്‍ ടീച്ചര്‍ പുറത്ത് പോയിക്കോ......."ടീച്ചറുടെ മറുപടി: " ഞാനിവിടെ പഠിപ്പിക്കുന്നത് 15 ലക്ഷം കൊടുത്താണ്. അതിനാല്‍ എനിക്ക് നിന്നെ പുറത്താക്കാനുള്ള അവകാശമുണ്ട്"

കഥകള്‍ നീണ്ടു പോകുന്നു. ഒരേ ഇതിവ്രുത്തം. "സ്വാശ്രയ വിദ്യാഭ്യാസം വാണിജ്യകേന്ദ്രമായി " എന്ന സുപ്രീം കോടതി വിധിയാണ് പെട്ടെന്ന് ഇതെല്ലാം ഓര്‍മ്മിപ്പിച്ചത്.

എന്‍ ഡി എ സര്‍ക്കാരിന്‍റെ കാലത്താണ് കേന്ദ്രവിദ്യാഭ്യാസ മന്ത്രാലയം പിരിച്ചു വിടുകയും മാനവ വിഭവശേഷി വകുപ്പ് അതേറ്റെടുക്കുകയും ചെയ്തത്. വിദ്യാഭ്യാസത്തെപ്പറ്റി പഠിക്കാന്‍ അന്നത്തെ ഗവണ്‍മെന്‍റ് ബിര്‍ള- അംബാനിമാരെ ഏല്‍പ്പിച്ചു. അവരുടെ നിര്‍ദ്ദേശം ഇങ്ങനെയായിരുന്നു:

(i) The Government should confine itself to Primary Education and the higher education should be provided by the Private sector.

(ii) Passage of the Private University Bill.

(iii) Enforcement of the user-pay principle in higher education.
(iv) Loans and Grants to the economically and socially weaker sections of society.

The Report suggested that the Government must concentrate more on Primary Education and less on Secondary and Higher education. It also recommended the passing of the Private Universities Act. The Birla- Ambani Report further recommended that the Government must encourage business houses to establish Educational Institutions.

പ്രൈമറി വിദ്യാഭ്യാസത്തില്‍ മാത്രം ഗവണ്‍മെന്‍റ് ഇടപെട്ടാല്‍ മതി. ബാക്കി ഞങ്ങള്‍ ബിസിനെസ്സുകാര്‍ നോക്കിക്കൊള്ളാം എന്നാണ് ഇവരുടെ വാദം. വിദ്യാഭ്യാസം മൂല്യമുള്ള ഒരു ചരക്കാണ് എന്ന് തുറന്ന് പറയാന്‍ ഈ കമ്മിറ്റിക്ക് ഒരു മടിയും ഉണ്ടായില്ല. കേരളമടക്കമുള്ള എല്ലാ സംസ്ഥാനങ്ങളിലും കൂണുകള്‍ പോലെ എന്‍ജിനീറിങ്/ മെഡിക്കല്‍ കോളേജുകള്‍ പൊങ്ങി വന്നു. ആവശ്യത്തിനും അല്ലാതെയും അനവധി എന്‍ജിനീയറ്മാര്‍/ഡോക്ടര്‍മാര്‍. 10 ലക്ഷം മുടക്കി പുറത്തിറങ്ങുന്ന എന്‍ജിനീയറുടേയും, 30-50 ലക്ഷം കൊടുത്ത് ഡോക്ടറാവുന്നവരുടേയും സാമൂഹ്യ പ്രതിപത്തിയെക്കുറിച്ച് ഒന്നാലോചിച്ച് നോക്കൂ. രോഗിയുടെ രോഗം മാറണമെന്നല്ല, അയാളെക്കൊണ്ട് പറ്റുന്നത്ര ടെസ്റ്റുകള്‍ ചെയ്യിപ്പിച്ച് പറ്റുന്നത്ര മരുന്ന് തീറ്റിച്ച് ഈ ലക്ഷങ്ങള്‍ തിരിച്ച് പിടിക്കാനാകും ഈ ഡോക്ടറുടെ ചിന്ത!

ഇതൊന്നും പോരാണ്ട് കോളേജുകളെ മൂല്യനിര്‍ണ്ണയം ചെയ്യാന്‍ (യൂണിവേര്‍സിറ്റികളെയും!) " നാക്" എന്ന ഗവണ്‍മെന്‍റേതര സ്ഥാപനത്തിനെ നിയമിച്ചു. കോളേജുകള്‍ മല്‍സരത്തിന് ഒരുങ്ങി. ഓരോ കോളേജും പുറമേക്ക് മോടിപിടിപ്പിച്ചു. കമ്മിറ്റിക്കാര്‍ക്ക് പന്‍ജനക്ഷത്ര ഹോട്ടലുകളില്‍ വിരുന്നൊരുക്കി. തമിഴ്നാട്ടില്‍ കമ്മിറ്റിക്കാര്‍ക്കായി വിദ്യാര്‍ഥിനികളെ കാഴ്ചവെക്കുകയടക്കം നടന്നു. ഏറ്റവും "നല്ല" കോളേജിന് "എ+". ബാക്കി താഴോട്ട്. എ+ കിട്ടിയ കോളേജിന് കൂടുതല്‍ പണം. ഡി കിട്ടിയ പാവപ്പെട്ട കോളേജുകള്‍ക്ക് ഏറ്റവും കുറഞ്ഞ പണം. പരിതസ്ഥിതികള്‍ മോശമായ കോളേജിനല്ലേ കൂടുതല്‍ ഫണ്ട് കൊടുക്കണ്ടത് എന്ന ന്യായമായ ചോദ്യം ആരും ചോദിച്ചില്ല. കോളേജുക്കളെ കോര്‍പ്പറേറ്റ് മല്‍സര നിയമങ്ങളിലേക്ക് കൊണ്ടുവരാന്‍ നാക്കിന് എളുപ്പം കഴിഞ്ഞു. രാഷ്ട്രീയം പാടില്ല, പോസ്റ്ററുകള്‍ പാടില്ല എന്നീ ഷണ്ഡീകരണപ്രവര്‍ത്തനങ്ങള്‍ കോളേജുകളില്‍ നടന്നുവന്നു. ഇടതുപക്ഷ അധ്യാപക സംഘടനകളടക്കം ഇതിനെ എതിര്‍ത്തില്ല, മറിച്ച് സ്വാഗതം ചെയ്തു. ഇതൊരു പ്രധാന വിഷയമായി എസ് എഫ് ഐ യൊ എ ഐ എസ് എഫ് ഓ കണ്ടില്ല. എസ് എഫ് ഐ സഖാക്കള്‍ നാക് സ്വീകരണക്കമ്മിറ്റികളില്‍ അംഗങ്ങളായി ഞെളിഞ്ഞ് നിന്നു!

സ്വകാര്യവല്‍ക്കരനം വിദ്യാഭ്യാസ രംഗത്ത് ദ്രുതഗതിയിലാണ് മുന്നേറുന്നത്. വിദ്യാഭ്യാസ രംഗത്തെങ്കിലും ബാക്കി നിന്നിരുന്ന സോഷ്യലിസ്റ്റ് കാഴ്ച്ചപ്പാടുകള്‍ ഒരു പതിറ്റാണ്ടുകൊണ്ട് നിലംപൊത്തി. റിലയന്‍സ് യൂണിവേഴ്സിറ്റികള്‍ രാജ്യത്ത് വരാന്‍ പോകുന്നു. സര്‍ട്ടിഫിക്കറ്റുകളില്‍ കോളേജിന്‍റെ പേരു ചേര്‍ത്ത് പല കിടയിലുള്ള വിദ്യാര്‍ഥികളെ സ്രുഷ്ടിച്ചുകൊണ്ടിരിക്കുന്നു. ആവശ്യങ്ങള്‍ക്കായി ഉല്‍പ്പാദിപ്പിക്കുക എന്നതിനു പകരം ഉല്‍പ്പാദിപ്പിച്ച് കഴിഞ്ഞ് ആവശ്യങ്ങളുണ്ടാക്കുക എന്ന മുതലാളിത്ത കാഴ്ച്ചപ്പാടിലാണ് വിദ്യാഭ്യാസ രംഗം ഇന്ന്. ഒരു രാജ്യത്തിന് ഇത്ര ഡോക്ടര്‍, ഇത്ര എന്‍ജിനീയര്‍ വേണം എന്ന ആസൂത്രണം ചിന്തയി പോലുമില്ല. വികലമായ ഒരു അഭ്യസ്ഥവിദ്യ സമൂഹമാണ് ഇവര്‍ സ്രുഷ്ടിച്ച്യ്കൊണ്ടിരിക്കുന്നത്.

അവസാനം വന്ന ഉന്നത വിദ്യാഭ്യാസ കൗണ്‍സിലിന്‍റെ പരിഷ്കാരങ്ങള്‍ നോക്കുക. ഭാഷ എന്നത് കമ്യൂണിക്കേഷന്‍ പഠനം മാത്രമാണിപ്പോള്‍(പുതിയ സെമസ്റര്‍ രീതിയില്‍). സയന്‍സ് പഠിക്കുന്നവന്‍ എന്തിന് ഷേക്സ്പിയറും ഷെല്ലിയും കാളിദാസനെയും ബഷീറിനെയുമെല്ലാം പഠിക്കുന്നത് എന്നാണവരുടെ ചോദ്യം. ഇന്ന് കോളേജുകള്‍ കോര്‍പ്പറേറ്റ് കംപനികളുടെ ട്രെയിനിങ്ങ് സെന്‍റര്‍ ആണ്. (കംപനികള്‍ക്ക് ഇനി ട്രെയിനിങ്ങിനായി പണം മുടക്കേണ്ട. കോളേജ് നല്‍കും അത്). അടിസ്ഥാന വിഷയങ്ങള്‍ക്ക് പ്രാധാന്യം കുറയുകയും ക്രുത്രിമകോഴ്സുകള്‍ പെരുകുകയും ചെയ്യുന്നു. തമിഴ്നാട്ടില്‍ ഒരു കോളേജില്‍ അപ്ലൈഡ് ഹിസ്റ്ററി എന്നൊരു കോഴ്സ് തുടങ്ങി!. 15 കുട്ടികെളേയും കിട്ടി. 3 മാസമെടുത്തു കോഴ്സിന്‍റെ മണ്ടത്തരം മനസിലാക്കാന്‍. കോഴ്സ് പിന്‍വലിച്ചു. കുട്ടികള്‍ അവതാളത്തില്‍!

ശാസ്ത്ര സാമൂഹിക രംഗങ്ങളില്‍ നമുക്കുണ്ടായ മുന്നേറ്റത്തെ മുഴുവന്‍ പിറകോട്ടടിപ്പിക്കുന്ന ഒരു വിദ്യാഭ്യാസ നയമാണ് ഇന്നു നടപ്പിലാക്കിക്കൊണ്ടിരിക്കുന്നത്. രാജ്യപുരോഗതിയെപ്പറ്റി വാതോരാതെ സംസാരിക്കുകയും വ്യക്തിസ്വാതന്ത്ര്യത്തിന്‍റെ പേരു പറഞ്ഞ് വിദ്യാഭ്യാസ കച്ചവടത്തെ ന്യായീകരിക്കുകയും ചെയ്യുന്ന ബുദ്ധിജീവികളെ നാം തിരിച്ചറിയേണ്ട കാലം വൈകി. സാമൂഹിക പരിവര്‍ത്തനത്തിനുതകുന്ന ഒരു വിദ്യാര്‍ഥി സമൂഹത്തെ വാര്‍ത്തെടുക്കുന്നതിനു പകരം സ്വാര്‍ഥ മല്‍സരാര്‍ഥികളെ സ്രുഷ്ടിക്കുകയാണിന്ന് വിദ്യാഭ്യാസരംഗം ചെയ്യുന്നത്. 'വികസനം' വരാന്‍ കോര്‍പ്പറേറ്റുകള്‍ക്ക് കോടിക്കണക്കിന് നികുതിയിളവ് നല്‍കുന്ന ഒരു ഗവണ്‍മെന്‍റിന് വിദ്യാഭ്യാസത്തിന് സൗകര്യമൊരുക്കാനാവില്ല എന്ന വാദം എത്ര വിരോധാഭാസമാണ്..! ഡെന്‍മാര്‍ക്ക് പോലുള്ള സ്കാൻഡിനേവിയൻ രാജ്യങ്ങൾ, ക്യൂബ എന്നിവിടങ്ങളിലെല്ലാം വിദ്യാഭ്യാസം മുഴുവനായും സൗജന്യമാണ്. ആണവത്തിനായി ദശലക്ഷം കോടികള്‍ ചിലവാക്കുന്ന ഇന്ത്യക്ക് എന്തുകൊണ്ടിത് സാധ്യമല്ല?

ഹിറ്റ്ലര്‍ എന്ന ജൂതന്‍

2010-08-28T02:19:00.000-07:00

ആര്യൻ മേധാവിത്വ സിദ്ധാന്തത്തിന്റെ ഉപജ്ഞാതാവായ ഹിറ്റ്ലറിന് ജൂതൻ-ആഫ്രിക്കൻ മുൻ ഗാമികളാണെന്ന് ഡി എൻ എ പരിശോധനയിൽ തെളിവു ലഭിച്ചിരിക്കുന്നു!! ലണ്ടനിലെ ഡൈലി എക്സ്പ്രസ് എന്നൻപത്രമാണ് ഈ വിവരം പുറത്തു വിട്ടത്. ജീൻ പോൾ മൾഡർ എന്ന ചരിത്രകാരനാണ് ഹിറ്റ്ലറുടെ വേരുകൾ തേടി പോയത്.

ഹിറ്റ്ലറുടെ ബന്ധുക്കളിൽ നടത്തിയ ൻഡി എൻ എ പരിശോധനയിൽ Haplopgroup E1b1b (Y-DNA) എന്ന ക്രോമസോം കണ്ടെത്തി. ഇത് യൂറോപ്പിൽ വിരളമായി കാണുന്ന ഒന്നത്രേ.ഇതിന്റെ ഉൽഭവം ആഫ്രിക്കയോ മിഡിൽ ഈസ്റ്റോ ആവാമെന്ന് വിദഗ്ധപറയുന്നു. കൂടാതെ ജൂതരിലും ഈ ക്രോമസോം കാണപ്പെടുന്നു. ക്രോമസോമിനെ പറ്റി ലേഖനത്തിൽ പറയുന്നതിങ്ങനെ: "It is most commonly found in the Berbers of Morocco, in Algeria, Libya and Tunisia, as well as among Ashkenazi and Sephardic Jews, one can from this postulate that Hitler was related to people whom he despised" (ഫ്രാങ്കൻബർഗർ എന്ന ജൂതന്റെ ജാര സന്തതിയായിരുന്നു ഹിറ്റ്ലറുടെ അച്ഛൻ എന്ന് പണ്ടു മുതലേ അഭ്യൂഹങ്ങളുണ്ട്.)

ഹിറ്റ്ലറുടെ 39 ബന്ധുക്കളുടെ ഡി എൻ എ പരിശോധനയാണ് മൾഡർ നടത്തിയത്. ന്യൂയോർക്കിൽ താമസിക്കുന്ന അലക്സാണ്ടർ സ്റ്റുവർട്ട് ഹൗസൺ എന്ന് ഹിറ്റ്ലറുടെ അനന്തരവന്റെ തൂവാലയിൽനിന്ന് കിട്ടിയ സാംപിളുകളും മൾഡർ പരിശോധനക്കെടുത്തു.

ലോകം കണ്ട ഏറ്റവും വലിയ വംശീയ ഹത്യ നടത്തിയ ഹിറ്റ്ലർ ജൂത പരംപരയാണ് എന്നു തെളിഞ്ഞാൽ അത് ഈ സഹസ്രാബ്ദത്തിന്റെ തന്നെ ഏറ്റവും വലിയ വിരോധാഭാസമാകും.ആര്യൻ രക്തം എന്ന ഒറ്റ വികാരം കൊണ്ട് ഒരു ജനതയെ മുഴുവൻ മയക്കിയ ആൾ പൂർണ്ണമായും ആര്യനല്ല എന്നത് ഏറ്റവും വലിയ കരിംഫലിതവും. ഇപ്പോഴും ഹിറ്റ്ലറിനെ പരസ്യമായി തന്നെ മാത്രുകയാക്കുന്ന ഇന്നത്തെ വംശവെറിയുടെ വക്താക്കളായ സംഘപരിവാര്‍ പോലുള്ള സംഘങ്ങള്‍ ഇതൊന്നു വായിച്ചാല്‍ കൊള്ളാം.

ബ്ലസ്സിയുടെ സ്ത്രീകൾ- ഒരു വിമർശനം

2009-09-13T02:19:00.000-07:00

വളരെ ചുരുങ്ങിയ കാലയളവിൽത്തന്നെ ഒരു സംവിധായകൻ എന്ന നിലയിൽ മലയാള സിനിമയിൽ വ്യക്തിമുദ്ര പതിപ്പിക്കാൻ കഴിഞ്ഞയാളാണു ബ്ലെസ്സി. പത്മരാജന്റെ സഹസംവിധായകൻ എന്നത്കൊണ്ടുള്ള നോസ്റ്റാൾജിക്‌ അടുപ്പവും മലയാളികൾക്ക്‌ ബ്ലസ്സിയൊട്‌ തോന്നിയിട്ടുണ്ടാവാം. അതിലുപരി കാമ്പുള്ള സിനിമകൽ സൃഷ്ടിക്കുന്നതിൽ ഒരു പരിധി വരെ ബ്ലെസ്സി വിജയിച്ചു എന്നു പറയാം. നന്മയുടേയും സ്നേഹത്തിന്റേയും അനിർവ്വചനീയമായ ഒരു തെളിചമാണു കാഴ്ച കണ്ടിറങ്ങുന്ന ഒരു പ്രേക്ഷകനു അനുഭവപ്പെടുക. തന്മാത്രയുടെ സ്ക്രിപ്റ്റിനു ഒരു നീറുന്ന അസ്വസ്ഥത നൽകാൻ കഴിഞ്ഞിട്ടുണ്ട്‌. തുടർന്നു വന്ന പളുങ്കും കൽക്കത്താ ന്യൂസും പരാജയങ്ങളായിരുന്നു. കഥയുടെ സ്ഥിരതയില്ലായ്മയാണു ഇവയെ പിന്നൊട്ടടിച്ചത്‌. ഒരുപാട്‌ വിഷയങ്ങൾ പറയാൻ ശ്രമിച്ച് ഒന്നുമാകാത്ത അവസ്ഥ. എന്നാൽ പിന്നീട്‌ ചെയ്ത ഭ്രമരം പ്രമേയംകൊണ്ടും കാഴ്ചകൊണ്ടും ശക്തമായിരുന്നു.അതിലെ ഫ്ലാഷ്ബാക്കിലെ പിശകുകൽ കാണാതിരിക്കുന്നില്ല എങ്കിലും മലയാലതിലെ strength ഉള്ള സിനിമയായി നമുക്കിതിനെ കാണാവുന്നതാണു.

ഞാൻ പറയാനുദ്ദേശിക്കുന്ന വിഷയം ടെക്നിക്കൽ അല്ല (അതിനുള്ള വിവരം ആയില്ലെന്ന് കൂട്ടിക്കോളൂ) മറിച്ച്‌ തികച്ചും സാമൂഹികം ആണു. ബ്ലെസ്സിയുടെ എല്ലാ സിനിമകളും നോക്കിയാൽ കാണാം അവയിൽ സ്ത്രീ എന്നത്‌ ദുർബല, അധികം പ്രാധാന്യം അർഹിക്കാത്ത, ഭർത്താവിനു ദാംപത്യസുഖം (ശാരീരികവും മാനസികവും) കൊടുക്കാൻ മാത്രമുള്ളതാണൊ എന്ന് പ്രേക്ഷകർക്ക്‌ തോന്നിപ്പോവുകയും ചെയ്യുന്ന കഥാപത്രമാണു. ബ്ലെസ്സിയുടെ ഒരു സിനിമയിലും നായകന്റെ ഭാര്യക്ക്‌ ഉദ്യോഗമില്ല. അവർ സംതൃപ്തരായ വീട്ടുജീവികൾ മാത്രമാണു. ഇതിലെ സംതൃപ്തി എന്ന സ്ത്രീ വിരുദ്ധ കാഴ്ചപ്പാടാണ് വമർശിക്കപ്പെടേണ്ടതും, അധികം വിമർശിച്ച്‌ കാണാത്തതും

ഒരു സ്ത്രീ സാമൂഹികമായ ഒരു ഇടപെടലുകളൊന്നും നടത്താതെ, ഉദ്യോഗതിനു പോവാതെ വീട്ടിൽത്തന്നെ ഇരുന്നാലും അവൾക്ക്‌ സംതൃപ്തയായി കഴിയാനാവും എന്ന് ഈ നായികമാരെ കണ്ടാൽ നമുക്ക്‌ തോന്നും. ഭർത്താവിന്റെ സ്നേഹം 'മാത്രം' മതി അവർക്ക്‌ സംതൃപ്തിയണയാൻ എന്ന ഒരു രീതി! അവരുടെ Identity ഭര്‍ത്താവിന്റെ സ്നേഹ പരിലാളനങ്ങളില്‍ മാത്രം!! ഒതുങ്ങിക്കൂടലിന്റെ അസ്വസ്ഥതകള്‍ പോലുമില്ല അവര്‍ക്ക്. കുറചുകൂടി വിശാലമായി പറഞ്ഞാൽ ബ്ലെസ്സിയുടെ സിനിമകൾ തികച്ചും വ്യക്തിപരമായ സിനിമകളാണു. വ്യക്തിബന്ധങ്ങൽ ചിത്രീകരിക്കാൻ സാമൂഹിക അവസ്ഥകളെ കടമെടുക്കുന്നു എന്നുമാത്രം.

കാഴ്ചയിലെ നായിക വീടിനുപുറത്ത്‌ നിൽക്കുന്ന ഷോട്ടുകൾപോലും വളരെ കുറവാണു. തന്മാത്രയിലാകട്ടെ നായിക കിടപ്പറയിലും അടുക്കളയിലുമാണു ഭൂരിഭാഗം സമയവും. പക്ഷെ അവളെ സാരിയുടുപ്പിച്ച്‌ തൃപ്തിയാക്കുന്നുണ്ട്‌ നായകൻ!പോരാത്തതിനു നായകനു മകനെപ്പറ്റി മാത്രമാനു സ്വപ്നങ്ങൽ. മകന്റെ പഠനം, മകന്റെ ഭാവി ..എന്നിങ്ങനെ. മകൾ തമാശ പറയാനും കളിക്കാനും മാത്രമാണോ എന്ന് തോന്നും. അവളെപ്പറ്റിയുള്ള ഒന്നുംതന്നെ അയാളുടെ സ്വപ്നങ്ങളില്ല!

'പളുങ്ക്‌'ലും ഇതേ കുടുംബ ചിത്രമാണു വരച്ചിരിക്കുന്നത്‌. ഒരു ചതുരത്തിനുള്ളിലെ ഭാര്യയും ഭർത്താവും മക്കളും! കൽക്കത്താ ന്യൂസിലാണു കുറച്ചെങ്കിലും വ്യത്യസ്തമായി സ്ത്രീയെ അവതരിപ്പിക്കാൻ ബ്ലെസ്സി ശ്രമിച്ചിട്ടുള്ളത്‌. എന്നാൽ നായകന്റെ കയ്യിലെത്തുന്നതുവരെ നായികയുടെ കന്യകാത്വം നിലനിർത്തുക എന്ന ഭാരിച്ച ഉത്തരവാദിത്വം ബ്ലെസ്സിയും ഏറ്റെടുക്കുന്നു (ചന്ദ്രോത്സവം, മാമ്പഴക്കാലം എന്നീ സിനിമകൾ ഓർക്കുക). ഈ അവസരത്തിലാണു നാം പത്മരാജനെ കാണേണ്ടത്‌. ' നമുക്ക് പാര്‍ക്കാന്‍ മുന്തിരി തോപ്പുകളില്‍' അഛൻ (രണ്ടാനഛൻ എന്നത്‌ സിനിമയുടെ കോമ്പ്രമൈസ്‌ ആണെന്ന് ഞാൻ കരുതുന്നു) ബലാത്സംഗം ചെയ്ത്‌ "നശിപ്പിച്ച" (!) ഒരു പെണ്ണിനെ പ്രണയപൂർവ്വം തന്നെയാണു നായകൻ സ്വീകരിക്കുന്ന്ത്‌! ഒരുതരത്തിൽ പറഞ്ഞാൽ പത്മരാജൻ സിനിമയെടുതത്‌ തന്നെ സ്ത്രീ കഥാപത്രങ്ങളെ ചിത്രീകരിക്കണാണെന്ന് തോന്നിപ്പോവും. അല്ലെങ്കിൽത്തന്നെ ക്ലാരയെപ്പോലുള്ള ഒരു സ്ത്രീ കഥാപാത്രത്തിനെ മലയാളസിനിമയിൽത്തന്നെ വേറെ എവിടെ കാണാൻ കഴിയും! എന്നാല്‍ ബ്ലെസ്സിയുടെ സ്ത്രീകളെല്ലാംസമൂഹത്തിൽനിന്നകന്ന് 'പതിവ്രതകളായി' നിലകൊള്ളുന്നു! സ്ത്രീ ഒരു ശരീരം (moreover a commodity) മാത്രമാണെന്ന കാഴ്ച്ചപ്പാടു തന്നെയാണ് ഇത് വെളിവാക്കുന്നത് .

അവസാന സിനിമയായ ഭ്രമരം നോക്കുക. സിനിമകണ്ടിറങ്ങി നായികയെപ്പറ്റി ചോദിച്ചാൽ അവളുടെ ശരീരത്തെപ്പറ്റിയല്ലാതെ ഒന്നും പറയാനുണ്ടാവില്ല. ഇത്രയും അപ്രധാനമായി അവതരിപ്പിക്കാനെങ്കിൽ എന്തിനു അന്യഭാഷാ നടിയെ അഭിനയിപ്പിച്ചു എന്ന് തോന്നിപ്പോവും അത്‌ കണ്ടാൽ. പിന്നെയും മെച്ചപ്പെട്ട അഭിനയം കാഴ്ചവക്കുന്നത്‌ ഉണ്ണിയുടെ ഭാര്യയായി അഭിനയിക്കുന്ന ലക്ഷ്മിഗോപാലസ്വാമിയാണ് . അവളും പക്ഷെ ഒരു വീട്ടമ്മ മാത്രം. ബ്ലെസ്സി സിനിമകളിൽ കാണുന്ന മറ്റൊരുസവിശേഷത എന്തെന്നാൽ സിനിമ വികസിച്ച്‌ വരുമ്പോള്‍ നായകനിലും വികാസം സംഭവിക്കുന്നു. എല്ലാ ക്യാമറകളും നായകനിൽ ഫോക്കസ്സ്ഡ്‌ ആവുന്നു. എന്നാൻ നായിക ഒരേനിലയിൽത്തന്നെ തുടരുന്നു. നായകനു മോറൽ സപ്പോർട്ട്‌ കൊടുക്കുക എന്ന വൈകാരിക ധർമ്മം നിവ്വഹിച്ചുകൊന്ടേയിരിക്കുന്നു. പോതുസമുഹം പോകട്ടെ, അന്ന്യ പുരുഷന്മരോടുള്ള സംസാരംപോലും ഈ നായികമാർക്ക്‌ വിലക്കപ്പെട്ടിരിക്കുന്നു!

ഇതൊന്നും മനപ്പൂർവ്വമല്ലായിരിക്കാം പക്ഷെ കാമ്പുണ്ട്‌ എന്ന് ജനങ്ങൾ പ്രതീക്ഷിക്കുന്ന ഒരു സംവിധായകൻ ഇത്‌ ശ്രദ്ധിച്ചേ മതിയാവൂ. ശവത്തിനുനേരെ വധശ്രമം നടത്താറില്ല എന്ന് ചുള്ളിക്കാട്‌ പറഞ്ഞത്‌ ഓർക്കുന്നു. അല്ലെങ്കിൽപ്പിന്നെ ഷാജികൈലാസിന്റെ സിനിമയിലെ സവർണ്ണ ഹൈന്ദവതയോ വിനയന്റെ വികലാംഗത്വമോ താര സിനിമകളിലെ ബിംബവൽക്കരണമോ വെറുതെ ചർച്ചിച്ച്‌ സമയം കളയാമായിരുന്നു! ബ്ലെസ്സി എന്ന സംവിധായകൻ അവരെപ്പോലെയല്ല എന്ന തോന്നലാണു ഈ പ്രതികരണതിനു കാരണം.